Metoda e re që përdor Facebook për të ndaluar lajmet e rreme

Facebook ka nisur shpërndarjen e armëve të tij të reja për të luftuar lajmet e rreme, që bëhen virale në internet. Opsionet e reja të rrjetit social tregojnë se çfarë ndodh kur poston një lajm të pavërtetë.

Përmes pikasjes së lajmeve të rreme nga palë të treta që shërbejnë si fact-checker, ose verifikues faktesh, përdoruesit mësojnë se një lajm ka shumë gjasa të jetë i pavërtetë dhe këshillohen mos të postojnë e shpërndajnë një lajm të tillë.

Le të zëmë se kërkon të ndash me miqtë një lajm, i cili rezulton të jetë i pavërtetë. Në çastin që kopjon linkun  në Facebook për ta postuar, një tabelë paralajmëruese tregon se vërtetësia e këtij materiali kundërshtohet nga Snopes.com dhe Associated Pres.

Edhe nëse zgjedh të injorosh këtë mesazh, Facebook nxjerr një dritare që shpjegon mbi lajmet e rreme.

Sigurisht që ekziston mundësi për të bërë postimin gjithsesi, por e njëjta tabelë do t’u shfaqet miqve tuaj.

Sa i takon monitorimit të lajmeve false, vetëm mediumet e certifikuara për të kryer verifikimet do të kenë mundësinë të sinjalizojnë këto lajme. Ndërsa në SHBA dhe në vende të tjera kryesisht anglisht folëse ky opsion është prezent, nuk dihet ende se si do të veprohet në vende si Shqipëria.

Më herët është diskutuar edhe për një mekanizëm ku vetë përdoruesit mund të sinjalizojnë lajmet false, por kjo mund të çojë edhe në abuzim me këtë opsion.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.