MIE, 2 aplikime të reja për HEC-e – Qarqet ku parashikohen të ndërtohen

Aplikimet për ndërtimin e hidrocentraleve me kapacitet të ulët prodhues deri në 2 MW kanë vijuar edhe gjatë ditëve të para të muajit Maj. Pranë Ministrisë së Infrastrukturës dhe Energjisë kanë mbërritur dy kërkesa të reja për miratimin e ndërtimit të dy HEC-eve në qarkun e Elbasanit dhe atë të Kukësit.

Aplikuesi Bashkim i Përkohshëm i Shoqërive “GMG” sh.p.k dhe “Engineering-Systems” sh.p.k. ka shprehur interes për të ndërtuar një HEC me kapacitet prodhues 2 MW në pellgun ujëmbledhës të përroit të Gjormit dhe lumit të Kushes, në Qarkun e Elbasanit.

Shoqëria “GMG” sh.p.k. ka si objekt të aktivitetit të saj zbulime gjeologjike, zhvillim minerar mbi dhe nën tokë, përpunimin, importin dhe eksportin e tyre.

Ndërsa shoqëria “Engineering-Systems” sh.p.k. kryen studime, projektime, ndërtime hidroteknike dhe hidroenergjitike, si dhe prodhon e tregton energji elektrike.

Ndërkohë, shoqëria “Kërnaja Power” sh.p.k me objekt aktiviteti ndërtim hidrocentrali dëshiron të ndërtojë një vepër të tillë në Qarkun e Kukësit. Referuar të dhënave të paraqitura pranë MIE, ajo është parashikuar të ndërtohet në përroin e Madh, degë e lumit Bushtricë.

Vetëm gjatë muajit të kaluar, pranë Ministrisë së Infrastrukturës dhe Energjisë mbërritën pesë kërkesa për ndërtimin e hidrocentraleve të vegjël në qarkun e Kukësit, Shkodrës dhe atë të Elbasanit.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.