MIE: Aplikim për HEC në Pogradec – Pavarësisht thatësirës së këtij viti, kërkesa mbetet e lartë
Ministria e Infrastrukturës dhe Energjisë ka njoftuar ditën e premte kërkesën e ardhur pranë këtij institucioni për ndërtimin e një hidrocentrali të vogël në Bashkinë Pogradec.
Bëhet fjalë për një impiant me kapacitet prodhues deri në 2 MW, i cili kërkohet të ndërtohet mbi pellgun ujëmbledhës të lumit të Kalivaçit dhe përroit të Dolistit, i cili është degë e Lumit të Dunshes.
Shoqëria e interesuar “AMME”, e ka përqendruar aktivitetin e saj në import-eksport, ndërtim hidrocentralesh, si dhe prodhim e shitje energjie.
Shprehja e lartë e interesit për ndërtime të hidrocentraleve të vegjël deri në 2 MW vjen si pasojë e praktikës së ndjekur së fundmi nga qeveria, e cila nuk i konsideron këto koncesione tipike. Në propozimin e saj, shoqëria e interesuar paraqet edhe tarifën përkatëse.
Interesimi nuk ka munguar kohët e fundit as pas miratimit të tarifave që do të aplikohen për impiantet fotovoltaike dhe eloike.
Vetëm gjatë muajve të verës, pranë Ministrisë së Energjisë kanë ardhur edhe aplikimet për ndërtimin e dy hidrocentraleve në Kukës, dy hidrocentraleve në Gjirokastër, si edhe për një tjetër hidrocentral në Pogradec.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.