Milan ndërron pronar – Berlusconi largohet pas 31 vjetësh në krye të klubit. Shifrat e marrëveshjes
Akti i fundit i kalimit të pronësisë së klubit kuqezi nga Silvio Berlusconi tek investitori kinez Li Yonghong është nënshkruar. Klubi i Milanit ka zyrtarisht një pronar të ri pas 31 vjetësh.
Fininvest ka dorëzuar në këtë mënyrë 99,93% të aksioneve tek Rossoneri Sport Investment Lux, një kompani e krijuar posaçërisht për të kontrolluar klubin e futbollit. Shifrat e marrëveshjes janë 520 milionë euro.
Pronari i ri mbërriti të mërkurën në Milano së bashku me të shoqen dhe pasdite ka marrë pjesë në një mbledhje me studion ligjore që ka mbikëqyrur operacionin. Ndërsa të enjten, pas kalimit të fondeve të transfertës në Luksemburg, është bërë kalimi i pronësisë në një mbledhje përfundimtare.
Në takim morën pjesë Berlusconi, Yonghong dhe Galliani i cili mban nga viti 1986 pozicionin e administratorit të deleguar të klubit. Krahas tyre ishin edhe studiot ligjore si dhe dy emra kyç në drejtimin e ardhshëm të Milanit: Marco Fassone dhe David Han Li.
Tani, pronarët e rinj do të përballen menjëherë me një sfidë: të përmbushin pritshmëritë e tifozëve në sfidën e së shtunës përballë Interit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.