Milionat e pagesave për largimet nga puna – KLSH: Nuk deklarohen në kundërshtim me ligjin rreth 40 milion dollar kosto të gjyqeve
Kontrolli i Lartë i Shtetit ka ngritur alarmin se rreth rreth 40 milionë dollarë detyrime nga vendimet gjyqësore të humbura nga shteti nuk raportohen si shpenzime në kundërshtim në ligjin, ndërkohë që ato rëndojnë në buxhetin e shtetit edhe më shumë për shkak të kamatvonesave të kripura.
Në raportin për buxhetin e vitit të shkuar të sapo depozituar në Kuvend, KLSH ka konstatuar se vendimet gjyqësore të formës së prerë nuk raportohen dhe nuk deklarohen si shpenzim në kundërshtim ligjin. Kjo krijon kushtet për akumulimin e kamatëvonesave si pasojë e vonesës në shlyerjen e tyre, nënvlerësimin e shpenzimeve të vitit dhe deficitit të vitit buxhetor, pagesën e tarifave përmbarimore si pasojë e mosekzekutimit vullnetar të vendimeve dhe thyerje të radhës së shlyerjes së vendimeve dhe selektivitet në përzgjedhjen e vendimeve për pagesë (mosrespektimi i FIFO).
Sipas raportimit nga MFE të gjendjes së detyrimeve të prapambetura konstatohet se stoku i detyrimeve të prapambetura deri në 31.12.2019 sipas llogarisë 4864100 “Vendime gjyqësore” llogaritet në rreth 3,9 miliardë lekë, afërsisht 40 milionë dollarë. Efekti i pagesave të kryera nga Buxheti i Shtetit për vitin 2019 për ekzekutimin e vendimeve gjyqësore vlerësohet: – për largim të padrejtë të punonjësve nga puna nëpërmjet llogarive të shpenzimeve operative vlerësohet në rreth 1,1 miliardë lekë “Shpenzime për ekzekutim të vendimeve gjyqësore për largim nga puna”; – për vendimet e tjera gjyqësore në rreth 736 milion lekë, rreth 7 milionë dollarë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.