Milva Ekonomi në ‘Argument’ shpjegon më shumë mbi amnistinë e kapitalit. – Procesi do jetë i përshpejtuar

E ftuar në ‘Argument’,  Milva Ekonomi, Kryetare e Komisionit të Ekonomisë në Parlament, është shprehur mbi amnistinë e paralajmëruar nga Kryeministri për asetet ekonomike dhe financiare të pazyrtarizuara.

“Kjo politikë e re vjen si nevojë për të zbardhur e deklaruar asetet e fituara në të zezë, por me punë të ndershme të çdo shqiptari. Bashkë me këtë amnisti, kjo politikë ka dhe vlera edukuese për shqiptarët, të cilët jo gjithmonë e kanë njohur rëndësinë e zyrtarizmit të aseteve ekonomike.”, është shprehur Znj. Ekonomi.

“Kjo amnisti është gjithashtu pjesë e planit të ri ekonomik që lidhet me nevojën e Shqipërisë për të krijuar një bum ekonomik në fazën e rindërtimit pas tërmetit të 2019-ës”- ka shtuar më tej Kryetarja e Komisionit të Ekonomisë.

Lidhur me datën e zbatimit të amnistisë, Znj. Ekonomi ka thënë se qeveria ende nuk ka shpallur një datë të saktë, por e sigurt është se procesi do të jetë i përshpejtuar. Më tej, ajo ka përfunduar duke theksuar se përjashtohen nga amnistia subjektet e OFL apo politikanët, prokurorët, gjyqtarët dhe rrethi i tyre familjar.

DOSTI BANUSHI – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.