Minishengeni bëhet “Ballkani i Hapur” – Nënshkruhet në Shkup marrëveshja, Rama: Pse të presim të mbyllur brenda kufijve?
Shqipëria, Serbia dhe Maqedonia e Veriut, gjatë Forumit Rajonal Ekonomik, të zhvilluar në Shkup kanë nënshkruar 3 marrëveshje bashkëpunimi. Memorandumet konsistojnë në mbrojtjen reciproke në rast katastrofash të tre vendeve, në lehtësimin e import-eksporteve, për të eliminuar barrierat dhe kontribuar në ecurinë ekonomike të vendeve të përfshira, dhe së treti lëvizja e lirë e lirë të njerëzve dhe lejimin e punësimit në Rajon.
Pas nënshkrimit të marrëveshjes është prezantuar emri i nismës ‘Ballkani i Hapur’, I cili do të zëvendësojë termin Minishengen që është përdorur deri tani. Nisma ‘Ballkani i Hapur’ u përshëndet nga të tre liderët që e nënshkruan, Edi Rama, Aleksandër Vuçiç dhe Zoran Zaev. Në fjalën e tij Rama tha se shtetet e Ballkanit Perëndimor nuk duhet të presin që të futen në BE për të lëvizur lirshëm me njëri-tjetrin, por të bëhen pjesë e kësaj nisme strategjike. Sipas Ramës, nuk duhet të qëndrohet mbyllur duke parë problemet e shteteve, por të ketë bashkëpunim për të zgjidhur çdo konflikt dhe për të rritur mirëqenien e qytetarëve.
Më tej Rama renditi përfitimet që do t’i vijë qytetarëve të të gjithë shteteve që do të përfshihen në këtë marrëveshje.
Takimi i radhës në kuadrin e marrëveshjes “Ballkani I Hapur” do të zhvillohet në Beograd më 15 tetor.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.