Ministri i brendshëm francez: 20% e azilkërkuesve në Francë nga Shqipëria – Rama: Rruga e azilkërkimit, e paligjshme dhe pa krye
Kryeministri Edi Rama ka zhvilluar sot një takim me Ministrin e Brendshëm të Francës, Gerard Collomb. Ai tha se kjo vizitë është një vijimësi për forcimin the thellimin e bashkëpunimit hap pas hapi nëpërmjet dy vendeve.
Rama shtoi më tej se ministri është njohur edhe me operacionin ‘Forca e Ligjit’ si dhe procesin e Vetingut.
“Ne kemi shpallur ambicien që në fund të këtij mandati Policia e Shtetit të jetë me standarde europiane dhe të hyjë në mesataren e policive në BE.”
Po ashtu, ai u ndal edhe te emigrimi i paligjshëm dhe te azilkërkimi.
“Rruga e azilkërkimit përbën në vetvete jo vetëm një rrugë të paligjshme, por edhe një rrugë pa krye.”
Ndërkohë, ka theksuar se procesi i frenimit të azilkërkuesve do të vazhdojë deri në fund.
Nga ana tjetër, ministri Collomb është shprehur se 20 për qind e azilkërkuesve në Francë janë shqiptarë. Por, ai shtoi më tej se ata janë treguar shumë bashkëpunues dhe janë përgjigjur në mënyrë të favorshme për kthimin e tyre në shtëpi.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.