Ministri Çuçi në thertoren e madhe Lezhës: ”I dhamë fund therjes së kafshëve nëpër rrugë. Të fokusuar tek siguria e produkteve me origjinë shtazore”/ FOTO
Ministri i bujqësisë, Bledi Çuçi, ka kryer një vizitë, në thertoren e madhe të Lezhës. Në fokus, të sigurisë së produkteve me origjinë shtazore, Ministri Çuçi, është shprehur se i është dhënë fund, therjes së kafshëve nëpër rrugë.
“Ne jemi shumë të fokusuar tek rritja e standardeve të sigurisë ushqimore sidomos tek produktet me origjinë shtazore”. Kështu është shprehur ministri i Bujqësisë dhe Zhvillimit Rural, z.Bledi Çuçi, teksa ishte në Lezhë për të parë nga afër një nga thertoret më moderne në këtë qark, e cila është ngritur dhe zgjeruar më tej falë fondeve të dhëna nga qeveria.
“Kjo është një nga thertoret më moderne jo vetëm të zonës, por gjithë vendit, e cila është ngritur me përkrahje nga Ministria e Bujqësisë. Kjo thertore është shembulli më i mirë për të treguar se tashmë i kemi dhënë fund gjithë asaj batërdie që bëhej me therjen e kafshëve jashtë dhe me mungesën e disiplinimit të një prej proceseve më të rëndësishme të sigurisë ushqimore”, tha ministri Çuçi.
Thertore “Mnela” ka qenë përfituese dy herë e fondeve të Skemës Kombëtare. Në total ka marrë rreth 34 milionë lekë. Pas këtij investimi numri i të punësuarve në të është trefishuar. Pritet që kjo thertore të zgjerojë kapacitetet edhe për therjen e gjedhëve.
Sot në Shqipëri therja e bagëtive është disiplinuar. Ne nuk shohim më skena therje nëpër rrugë. Ky shërbim lidhet direkt me sigurinë ushqimore prandaj dhe Ministria e Bujqësisë dhe Zhvillimit Rural bashkë me agjencitë që ka në varësi, ka nxitur ngritjen e thertoreve me standarde bashkëkohore.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.