Ministri Çuçi paralajmëron ligje të reja për të forcuar sigurinë ushqimore. AKU-ja do pësojë ndryshime serioze
Gjatë një vizite në një thertore në Korçë ministri Çuçi ka shpjeguar se edhe për vitin 2020 në fokus kryesor të Ministrisë së Bujqësisë do të mbetet rritja e sigurisë ushqimore.
Në këtë mënyrë pritet që organi zyrtar për këtë përgjegjësi Autoriteti Kombëtar I Ushqimit, të kalojë nëpër disa reforma serioze duke marrë më shumë përgjegjësi nëpërmjet ndryshimit të ligjeve, që do t’i japin në dorë instrumente të ndryshme për të garantuar sigurinë ushqimore.
Gjatë një vizite në një thertore në Korçë, ministri Çuçi u shpreh se brenda muajit shkurt miratohen ndryshimet në ligjin e ushqimit.
Projektligji për ushqimin, ka për objektiv të sigurojë dhe garantojë që çdo hallkë e zinxhirit ushqimor të jetë shumë e fortë për të arritur synimin që shëndeti i konsumatorit të jetë plotësisht i mbrojtur.
“Brenda muajit shkurt ne do të miratojmë në Parlament ndryshimet përkatëse në ligjin për Ushqimin, të cilat i hapin rrugë një reformimi tërësor të Autoritetit Kombëtar të Ushqimit, për ta kthyer këtë institucion nga një agjenci ku 60% të punës merret me kontrolle rutinë të kioskave, fast food-eve apo restoranteve në një agjenci që të garantojë sigurinë ushqimore në sistem, në mënyrë që të paraprijmë gjithë procesin e përafrimit të standardeve tona me ato evropiane. Synojmë një ridimensionim tërësor të shërbimit veterinar në Shqipëri.”, tha ministri Çuçi.
E gjitha kjo sipas ministrit Çuçi bëhet në mënyrë që siguria jonë ushqimore të afrohet në të njëjtën masë me standartet e vendosura nga BE-ja, duke lehtësuar në këtë mënyrë edhe eksportimin e produkteve në vendet e Eurozonës, pa pasur nevojën e kontrollove shtesë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.