Ministri i Financave: Protestat e jelekëve të verdhë, një ‘katastrofë ekonomike’ për Francën
Protestat e “jelekëve të verdhë” kanë qenë “një katastrofë” për ekonominë franceze, thotë ministri i financave.
Franca ka parë katër javë të njëpasnjëshme demonstrata kundër rritjes së taksave të karburantit, kostos së lartë të jetesës dhe çështjeve të tjera.
Rreth 125,000 protestues dolën në rrugë të shtunën, me më shumë se 1,700 njerëz të arrestuar. Disa vende turistike, duke përfshirë Kulla Eifel dhe Muzeun e Luvrit, janë mbyllur këtë fundjavë.
Ministri i Financave Bruno Le Maire e quajti situatën “një krizë” për shoqërinë dhe demokracinë.
“Kjo është një katastrofë për tregtinë, është një katastrofë për ekonominë tonë”, tha ai gjatë një vizite në dyqanet në Paris që ishin dëmtuar gjatë protestave.
Kryeqyteti ishte veçanërisht i goditur rëndë, me dritare të shkatërruara, makina të djegura dhe dyqane të grabitura, pasi 10,000 vetë morën pjesë në demonstrata.
“Kishte më shumë dëme dje se një javë më parë”, sepse protestat e së shtunës ishin më të shpërndara, tha zëvendëskryetari i bashkisë Emmanuel Gregoire.
Megjithatë, ai shtoi se kishte më pak lëndime krahasuar me javën e kaluar.
Presidenti Emmanuel Macron, do t’i drejtohet kombit në ditët në vijim. Ai pritet të takojë udhëheqësit e sindikatave dhe bizneseve të hënën në mëngjes.
E.Z/SCAN
Lexo edhe këtë: “Jelekët e verdhë” – Më në fund Macron do të flasë, deklaratë e madhe javën e ardhshme!
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.