Ministri i Jashtëm Cassis: Zvicra ka nevojë për më shumë kohë për të nënshkruar traktatin e BE-së

Sistemi politik i Zvicrës i ndërtimit të konsensusit kërkon më shumë kohë për të arritur një marrëveshje me Bashkimin Europian për një traktat të ri, tha Ministri i Jashtëm Ignazio Cassis, duke mos sugjeruar zgjidhje të shpejtë për një pengesë potencialisht të dëmshme. Një betejë e fshehtë për aksesin e investitorëve të bursave zvicerane dhe të BE-së filloi këtë javë pasi qeveria zvicerane nuk arriti të përmbushë afatin e Brukselit për të përqafuar paktin e negociuar për më shumë se katër vjet. Edhe më shumë fërkime midis Zvicrës neutrale dhe partnerit të saj më të madh tregtar do të krijohen, nëse asnjë marrëveshje për traktatin që Brukseli ka kërkuar për një dekadë nuk realizohet, deri në kohën kur përfundon mandati i Komisionit Europian më 31 tetor.

Por Cassis tha se zviceranët nuk do të nxiteshin për nënshkrimin. “Kemi marrë vendime shumë të qarta dhe kemi bërë përparim në këtë dosje por ritmi i kërkuar nga BE nuk korrespondon me mundësitë e një demokracie të drejtpërdrejtë si Zvicra,” i tha Cassis transmetuesit zviceran SRF në një intervistë nga Moska transmetuar të martën vonë. “Si rezultat, do të thonim: Ne kemi lëvizur dhe presim që Bashkimi Europian të lëvizë”. Ai i referohej sistemit zviceran i cili u jep votuesve fjalën e fundit për të gjitha çështjet e rëndësishme dhe perspektivën për të kundërshtuar një traktat. Opozita nga i gjithë spektri politik e ka bërë praktikisht të pamundur që qeveria zvicerane të nënshkruajë draftin e traktatit tani, bënë me dije burime të afërta me këtë çështje për Reuters muajin e kaluar.

Traktati nënkupton që Zvicra jo anëtare e BE-së, në mënyrë rutinore të miratojë rregullat e tregut të BE-së dhe qytetarët e BE-së në Zvicër të gëzojnë të njëjta të drejta si në vendet e tyre. Do të hapte mundësinë e marrëveshjeve të reja tregtare, të tilla si për një bashkim të energjisë elektrike që kombinon shërbimet zvicerane dhe ato europiane. Por kundërshtarët variojnë nga Partia Popullore Zvicerane e ekstremit të djathtë, e cila e quan traktatin një shkelje të papranueshme të sovranitetit, tek socialdemokratët e qendrës së majtë, të cilët kundërshtojnë hedhjen poshtë të rregullave zvicerane që mbrojnë pagat më të larta të Europës nga konkurrenca ndërkufitare.

Kabineti zviceran këtë muaj i kërkoi Brukselit që të sqarojë dispozitat mbi mbrojtjen e pagave, ndihmën shtetërore dhe të drejtat e shtetasve të BE në Zvicër përpara se të nënshkruhet traktati, duke zhgënjyer dëshirat e BE-së për të përmbyllur më në fund një vit negociatash. Ndryshe nga divorci i çrregullt britanik i Brexit nga BE, Zvicra ka një larmi prej 120 marrëveshjeve sektoriale që qeverisin lidhjet e BE dhe që do të mbeten në fuqi në mungesë të një traktati të ri. Por rreziku është se ato do të vjetrohen me kohën pasi rregullat europiane evoluojnë.

Burimi: Reuters

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.