Ministri i Rindërtimit, Ahmetaj për masat pas tërmetit: “Bashkia të përcaktojë tokat shtetërore, qytetarët të aplikojnë”
Ministri i Rindërtimit, Arben Ahmetaj ka sqaruar të gjitha vendimet e marra nga qeveria sa i përket procesit të rindërtimit të vendit pas tërmetit të 26 nëntorit.
Në një konferencë të posaçme nga kryeministria, ministri në detyrë ka sqaruar se të gjitha rindërtimet do të bëhen në pronat shtetërore, për këtë arsye u ka bërë thirrje kryebashkiakëve në zonat e Emergjencës ( në qarkun e Tiranës, Durrësit dhe Lezhës) që brenda 20 ditëve nga ky moment që të përcaktojnë tokat shtetërore, ku do bëhet rindërtimi.
“Procesi konkret ka filluar që një ditë pas tërmetit ka vazhduar me akomodimin e të gjithë qytetarëve që humbën shtëpitë e tyre, bonusi i qirave bën të mundur që të gjithë familjarët të vazhdojnë të kenë mundësinë e një shtëpie me qira dhe në 2 janar Rama ka kërkuar nga Bashkitë në zonë e Emergjencës, të gjithë kryetarëve përkatës të Bashkive të fillojnë procesin ligjor të përcaktimit të tokave ku do të ndërtohen qytezat urbane të cilat Rama u është referuar në vazhdimësi dhe janë pjesë e ligjit të posaçëm për rindërtimin. Brenda 15-20 ditë do të kemi të përcaktuar në të gjithë territorin e Shqipërisë. Të gjitha Bashkitë janë të detyruara brenda afatit të sjellin të gjithë verifikimin e trojeve ose tokave ku do ndërtohen banesat individuale apo qytezat. Ndërkohë, sot kemi kaluar vendime për përcaktimin e rregullave, masën e shpenzimit që kompensohen autoriteteve përgjegjëse të qytetarëve që do përfitojnë. Për herë të parë në 30 vite që hartohet një ligj i posaçëm në përgjigje të emergjencës”, tha Ahmetaj.
Teksa shprehet se kjo është hera e parë në 30 vite që hartohet një ligj i posaçëm, Ahmetaj u bëri thirrje qytetarëve të prekur nga tërmeti që të aplikojnë në Bashkitë përkatëse për të përfituar një banesë të re ose rikonstruksion. Procedura e aplikimit do të jetë shumë e thjeshtëzuar, sqaroi Ahmetaj, teksa bëri me dije se nga ky proces, do të përfitojnë edhe ata që kanë pasur ndërtime pa leje.
Ministri i Rindërtimit Arben Ahmetaj ka përmendur vendimet e marra në kuadër të procesit të rindërtimit të banesave të dëmtuara nga tërmeti. Ahmetaj deklaroi se do të bëhet lista ligjore e familjeve që kanë pësuar dëmtime nga tërmeti, shtëpitë e të cilëve janë të banueshme me kusht rikonstruksioni si dhe pjesa tjetër që janë shpallur të pabanueshme. Ai tha se do ngrihet një platformë aplikimi për ta në çdo bashki, ku çdo qytetar mund të aplikojë fare lehtë. Ahmetaj u shpreh se afati i bashkive për të ndërtuar masterplanet për rindërtimin është 30 ditë, si dhe shpjegoi se ato do të vihen në zbatim përmes dy mënyrave, me anë të një mini-projekti (që prek vetëm një banesë), si dhe nëpërmjet bashkive që do të aplikojnë rikonstruksion të përqendruar në një zonë të prekur nga tërmeti.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.