Ministri Peleshi: Shqipëria dhe Izraeli së shpejti marrëveshje bashkëpunimi në fushën e Mbrojtjes
Ministri i Mbrojtjes, Niko Peleshi ka bërë me dije se Shqipëria dhe Izraeli do të nënshkruajnë një marrëveshje të re bashkëpunimi në fushën e Mbrojtjes.
Në vijim të vizitës së tij disa ditore në Izrael, ministri i Mbrojtjes, u prit në një takim zyrtar nga ministri i Mbrojtjes së Izraelit, Benjamin Gantz, me të cilin diskutuan mbi forcimin e marrëdhënieve mes dy vendeve në fushën e sigurisë.
Sipas informacionit të publikuar në faqen zyrtare, Peleshi bëri një përshkrim të përgjithshëm të synimeve që ka vendi ynë për të ndërtuar dhe çuar në një nivel konkurrues kapacitetet në fushën e inovacionit teknologjik, duke ndjekur edhe modelin e Izraelit, si një nga pesë vendet lider të botë në këtë aspekt.
Gjatë takimit, Peleshi shprehu vlerësimin e tij për Izraelin si një partner shumë i rëndësishëm i NATO në rajonin MENA (Middle East and Northern Africa) si edhe për politikën konstruktive të ndjekur në Forumin e Dialogut të Mesdheut.
Në informacionin e publikuar thuhet se Ministri falënderoi homologun Gantz për vendimin historik të njohjes së Pavarësisë së Kosovës nga shteti i Izraelit, që u pasua edhe me vendosjen e marrëdhënieve diplomatike dhe hapjen e ambasadave përkatëse.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.