Ministria e Arsimit shpall thirrjen / Kush ka mbaruar “Bachelor-in” ka mundësinë për praktikë në administratë

Ministria e Arsimit, Sportit dhe Rinisë ka publikuar në datën 24 Janar, në Fletoren Zyrtare shpalljen e “Thirrjes së pestë”, në kuadër të Programit Kombëtar të Praktikave të Punës.

Studentë që kanë mbaruar nivelin e studimeve “Bachelor” do t’i jepet mundësia për praktika në administratën shtetërore, njësitë e vetëqeverisjes  vendore, si dhe në shoqëri tregtare.

Procesi  i  aplikimit  fillon  në  datën  7  shkurt 2020 dhe përfundon në 29 shkurt 2020;

Kriteret që kandidatët duhet të plotësojnë, për të vazhduar më tej me aplikimin janë:

“a) aplikantët duhet të kenë mbushur 21 vjeç deri në datën 9 mars 2020, si dhe të jenë deri në 26 vjeç në   datën   9   mars   2020   (fillimi   i   programit   të praktikës);

b) aplikantët duhet   të   jenë   minimalisht   të diplomuar në programet e studimit të ciklit të parë Bachelor, deri në datën 9 mars 2020;

c) aplikantët nuk  duhet  të  kenë  qenë  pjesë  e programit në thirrjet e mëparshme, pasi qëllimi i tij është ofrimi i një përvoje kualifikuese, që ndikon në zhvillimin  e  aftësive  profesionale e  të  shprehive  të tyre  praktike,  në  njohje  me  sistemin  administrativ publik.” – shkruhet në thirrje.

Programi  Kombëtar  i  Praktikës  së  Punës, do të zgjasë 3 muaj. Ai fillon  më  datën  9  mars  2020  dhe përfundon më datën 9 qershor 2020.

Aplikimi do të kryhet në platformën zyrtare të programit: http://praktika.arsimi.gov.al/. Në këtë platformë do të publikohen profilet studimore të kërkuara nga institucionet pjesëmarrëse  në  program,  me  qëllim  orientimin  e kandidatëve.

Në  formatin  e  aplikimit  kërkohen  të  dhënat,  si më poshtë:

“a) studimet e fundit të përfunduara;

b) përcaktimi i mesatares së studimeve të fundit të përfunduara, me të cilat aplikanti po kandidon;

c) jetëshkrimi dhe  letra  e  motivimit,  në  të  cilën kërkohet   të   shpjegohet   se   si   kjo   praktikë   në institucionin  përkatës  do  të  ndikonte  në  rritjen  e tij/saj profesionale”.

Shpallja  e  fituesve bëhet brenda 10 ditëve kalendarike nga mbyllja e aplikimit.

“Praktikanti do të kryejë praktikën e punës pranë institucionit ku është pranuar, çdo ditë, nga e hëna deri të premten, orar zyrtar. Që të certifikohet për përfundim me sukses të  programit, kandidati duhet  të marrë pjesë minimalisht në 80% të periudhës së zhvillimit  të programit”, shprehet Ministria e Arsimit në shpalljen e thirrjes.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.