Ministria e Financave bën njoftimin: ‘Shtyhet afati për rivlerësimin e pronave. Shkak pandemia e COVID-19’

Këshilli i Ministrave ka miratuar propozimin e Ministres së Financave dhe Ekonomisë, Anila Denaj për të shtyrë deri në fund të vitit 2020 afatin “Për vlerësimin e Pasurive të Paluajtshme”.

Tashmë ligji ka kaluar për shqyrtim në Kuvend dhe pritet të miratohet nga deputetët, me shumicë votash.

Afati për vlerësimin e pronave ishte paracaktuar deri në 30 shtator, por duke qenë se kriza e COVID-19 shkaktoi probleme në shumë procese të administratës shtetërore, Ministria e Financave ka ofruar një zgjidhje të re.

Rivlerësimi i pronave ka një rëndësi të veçantë sa i përket nxitjes së formalizimit në tregun e pasurive të paluajtshme dhe shihet me interes të madh nga publiku, ku sipas statistikave të Ministrisë në vitin e kaluar kanë qenë plot 160 mijë prona të rivlerësuara nga qytetarët.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.