Ministria e Financave të Kosovës bën njoftimin: “Po mashtrohen qytetarët për përfitimin nga paketat financiare”
Ministria e Financave në Kosovë ka njoftuar paraditen e së martës të gjithë qytetarët për një rast mashtrimi i kryer nga persona që ende nuk janë në dijeni.
Ministria paralajmëron të gjithë qytetarët që të mos japin të dhënat e tyre personale për të përfituar nga Pakoja Emergjente Fiskale, siç cilësohet në email-in e dërguar nga persoan të paidentifikuar.
Të dhënat personale sipas njoftimi mund të përdoreshin nga abuzuesit e krimit kibernetik për të hyrë në informacionet e llogarive bankare.
Më tej qeveria kosovare tregon se informacionet zyrtare për ndihmat financiare mund të merren vetëm nëpërmjet adresës zyrtare të cilat vijnë nga domeni zyrtar (@rks-gov.net).
Njoftimi i plotë:
Sot në ora 15:08 minuta, nga një adresë elektronike e panjohur dhe me qëllim dashakeq (mf.rksgov.net@outlook.com) është dërguar një njoftim gjoja në emër të Thesarit të Ministrisë së Financave dhe Transfereve, në drejtim të një numër të caktuar të adresave elektronike zyrtare, gjoja për mundësinë për të përfituar nga Pakoja Emergjente Fiskale, nëpërmjet plotësimit të të dhënave të caktuara të natyrës personale.
Ministria e Financave njofton opinionin e gjerë se ky njoftim nuk ndërlidhet fare me Ministrinë e Financave dhe strukturat e saj, dhe si i tillë ka qëllim mashtrimin, duke rënë kështu në domenin e krimit kibernetik. Përveç kësaj, vegza e bashkëngjitur në këtë njoftim “orienton” pranuesit në një formular, i cili shihet të jetë një formë e mashtrimit, për mbledhjen në mënyrë të kundërligjshme të dhënave të ndjeshme personale dhe atyre bankare. Andaj, kërkojmë nga të gjithë zyrtarëve apo qytetarëve që kanë pranuar këtë njoftim të mos plotësojnë të dhëna e kërkuara dhe në raste të tilla të njoftojnë Policinë e Kosovës për këtë rast.
Ministria e Financave komunikon vetëm përmes adresave zyrtare të cilat vijnë nga domeni zyrtar (@rks-gov.net). Për këtë Agjencia Shoqërore e Informacionit (ASHI) tashmë ka ndërmarrë veprimet e nevojshme për sigurinë dhe ka njoftuar përdoruesit e domenit të institucioneve të Kosovës.
Me qëllim të zbardhjes së këtij veprimi me elemente të veprës penale, Ministria e Financave do të bashkëpunojë ngushtë me organet e rendit, dhe do ta njoftojë me kohë opinionin publik për zhvillimet e mëtutjeshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.