Ministria e Mbrojtjes shpall tenderin- Mbi 280 milionë lekë për mbrojtjen e lumenjve nga përmbytjet. Zonat ku do të investohet

Ministria e Mbrojtjes do të investojë mbi 280 milionë lekë për mbrojtjen e lumenjve dhe përrenjve nga përmbytjet.

Tenderi është njoftuar në Agjencinë e Prokurimit Publik dhe do të qëndrojë i hapur deri në 16 shtator, ora 10:00. Projekti do të përfshijë rehabilitimin e argjinaturave të lumenjve apo përrenjve, duke shmangur në këtë mënyrë, situatat emergjente civile.

Sipas detajeve të projektit, të gjitha rehabilitimet do të përmbyllen brenda një afati 3 mujor, që nga nënshkrimi i kontratës me subjektin fitues të tenderit. Në projekt përfshihet lumi Vjosë, lumi i Semanit, përrenj të ndryshëm në Lezhë, lumi Shkumbin, etj.

Projekti parashikon ripunimin e kanaleve ekzistuese, nivelimin e shkallëve të shtresave rreth lumenjve dhe përrenjve, studimin e  sipërfaqes e vijës së ujit. Gjithashtu, do të ripunohen pjesët anësore të kanaleve, me qëllim sigurimin e gjerësisë.

Detajet e punimeve përfshijnë mbushjet anësore të këtyre kanaleve për krijimin e sipërfaqeve jo vetëm të sigurta, por edhe  estetikisht të rregullta.

Dalja e lumenjve nga shtrati për shkak të shirave ka qenë gjithmonë një problem në vend, e menaxhimi i situatave pas përmbytjeve edhe më shumë. Ky investim nga Ministria e Mbrojtjes pritet në mos të ndalojë, të parandalojë situatat kaotike që krijohen nga përmbytjet e reshjeve të shiut.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.