Ministria e Shëndetësisë shpall vende të lira për mjekë familje – Kriteret dhe afati i fundit për aplikim
Ministria e Shëndetësisë dhe Mbrojtjes Sociale ka shpallur vende vakante për punësimin e mjekëve në Qendrat Shëndetësore në Bashkinë e Tiranës dhe atë të Kavajës. Sipas MShMS-së, aplikimi është i hapur për të gjithë mjekët që janë në kërkim të një veni pune dhe janë të pajisur me lejen e ushtrimi të pozicionit.
Lidhur me dokumentacionin për aplikim, përfshihet:
- Jetëshkrimi i kandidatit (CV)
- Diploma Universitare dhe lista e notave
- Diploma e specializimit (nëse kanë)
- Leja e ushtrimit të profesionit nga Urdhri i Mjekut
- Dëshmi të gjuhës së huaj (nëse kanë)
- Dëshmi/certifikata të kualifikimeve/ trajnimeve në fushën e shëndetësisë
- Fotokopje e Librezës së Punës
Ndërkohë, për kandidatët të cilët kanë studiuar jashtë vendit, duhet që diploma e tyre të jetë e njohur nga Ministria e Arsimit, Sportit dhe Rinisë. Ata mund të aplikojnë për më shumë se një pozicion.
“Në rast se për një pozicion pune paraqitet një kandidat i vetëm, kandidati thërritet në intervistë për të diskutuar mbi dokumentacionin e paraqitur dhe më pas ministria autorizon direkt drejtorin e qendrës shëndetësore për lidhjen e kontratës së punës me kandidatin”, thuhet më tej në njoftimin e Ministrisë.
Ndërsa, në rastet ku për një pozicion pune paraqiten më shumë se një kandidat, atëherë do të organizohet një procedurë konkurrimi me dosje.
Kandidatët mund të konkurrojnë përmes dosjeve të tyre dhe kërkesat së bashku me dokumentacionit do të dorëzohen pranë Ministrisë së Shëndetësisë çdo ditë nga ora 12:00 -14:00, deri më datë 10 Tetor 2018.
Ndërkohë, sipas MShMS, për vazhdimin e procedurës kandidatët do të njoftohen me email.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.