Ministrja Denaj në Këshillin e Investimeve: “Do të rishikojmë Buxhetin. Parashikohet ulje e PBB nga -2 deri në -5%. ”
Ashtu siç edhe është paralajmëruar, Ministria e Financave dhe Ekonomisë do të bëjë një rishikim të buxhetit të shtetit për të reflektuar sa më mirë goditjen që ka shkaktuar në uljen e Prodhimit të Brendshëm Bruto pandemia e COVID-19.
Këtë ka njoftuar ministrja Denaj në mbledhjen e Këshillit të Investimeve, ku mblidhen përfaqësues të bizneseve dhe partnerë ndërkombëtarë dhe në të cilën ka bërë një panoramë për sipërmarrjen dhe ekonominë shqiptare post-COVID.
Ministrja Denaj ka bërë me dije se dy krizat e njëpasnjëshme që goditën Shqipërinë, si tërmeti dhe pandemia do të ndikojnë në një masë më të madhe seç ishte menduar në Buxhet.
“Duke parë kuadrin makrofiskal jemi duke u përgatitur për një rishikim të dytë të buxhetit, ku parashikohet një ulje e PBB-së, midis nivelit -2 deri në -5%. Sigurisht, kjo do të jetë subjekt i diskutimeve në muajin korrik”, ka thënë ministrja Denaj. Sipas saj, qeveria nëpërmjet paketave mbështetëse financiare ka amortizuar këto goditje duke mbrojtur vendet e punës dhe zgjeruar aktivitetin ekonomik e tregtar.
Ministrja më tej njoftoi se vëmendje e veçantë do t’i kushtohet pikërisht zhvillimit të:
-SME dhe Start-Up-eve
-Agrobiznesit
-Zinxhirit të vlerës dhe
-Dixhitalimin e ekonomisë dhe sektorit privat.
Posted by Anila Denaj on Friday, June 5, 2020
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.