Ministrja Denaj pjesë e konferencës ndërkombëtare: “Jemi plotësisht të angazhuar për Objektivat e Axhendës 2030.”
Ministrja Anila Denaj ka qenë në ditën e sotme pjesë e Konferencës “Angazhimi i Sektorit Privat në kuadër të Objektivave të Zhvillimit të Qendrueshëm”, organizuar nga Dhoma Ndërkombëtare e Tregtisë (ICC), si përfaqësuese e qeverisë shqiptare.
Sipas Denaj, qeveria shqiptare është plotësisht e angazhuar për të marrë masa në kuadër të Agjendës së përbashkët 2030 të Kombeve të Bashkuara:
“Qeveria është angazhuar plotësisht në të gjitha Objektivat e Axhendës 2030, për një proces që do të marrë kohën e vetë deri në realizimin sa më të afërt të tyre. Angazhimi për rimëkëmbjen e ekonomisë dhe masat në mbështetje të biznesit dhe qytetarëve kanë qënë pjesë e këtij vizioni. Së bashku me zyrën e Kombeve të Bashkuara po zbatojmë një program, i cili do të na ndihmojë në këtë aspekt, atë të Politikave Strategjike për Objektivat e Zhvillimit të Qendrueshëm.” – u shpreh ministrja në konferencë.
Më tej ministrja e Financave dhe Ekonomisë ka shpjeguar se si po përfshihet sektori privat në këtë program:
“Qeveria ka krijuar platforma të dialogut publik – privat ndër vite. Pranë Ministrisë së Financave dhe Ekonomisë, është krijuar Sekretariati i Këshillit të Investimeve, një strukture, e cila bën qartazi rolin e ndërmjetësit për sugjerime politikash. Në të njëjtën kohë platformat me sektorin privat nuk mungojnë as në kuadër të çështjeve të punës dhe arsimit profesional, përmes Këshillit Kombëtar të Punës apo Këshillit të sapokrijuar të Arsimit Profesional.” – u shpreh ministrja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.