Ministrja Denaj prezanton Aktet Normative të Buxhetit: “1.4 mld shtesë për Shëndetësinë. Preket arsimi dhe ujësjellësi”

Ministrja e Financave dhe Ekonomisë, Anila Denaj ka mbajtur në ditën e sotme një konferencë për shtyp, në të cilën ka miratuar Aktet Normative për Buxhetin e Shtetit 2020, duke prezantuar edhe rishikimet e kryera.

Siç edhe ishte paralajmëruar, qeveria ka akorduar 3.4 mld lekë shpërblimin për pensionistët në masën 5000 mijë lekë, ku përfitojnë mbi 677,906 persona.

Gjithashtu ministrja Denaj ka njoftuar edhe akordimin shtesë që i është bërë Ministrisë së Shëndetësisë dhe Mbrojtjes Sociale me 1.4 mld lekë. 400 milionë lekë shkojnë për spitalet, në shërbim të situatës Covid-19, ndërsa 1 mld lekë nga kjo shtesë do të shkojë për skemën e Ndihmës Ekonomike dhe Paaftësisë.

Akti Normativ njëkohësisht parashikon edhe një mbështetje shtesë për infrastrukturën dhe energjinë dhe konkretisht për të mbështetur reformën e ujit

“Në Aktin Normativ të fundit, shkon 2.9 miliardë lekë  pagesa për rreth 30 projekte, të cilat kanë avancuar me punimet që zbatohen nga agjencitë përkatëse dhe bashkitë me fondet e buxhetit të shtetit.“

Jo më pak e rëndësishme në alokimet e buxhetit të vitit 2020 është edhe një shtesë në masën  e 673 milionë lekë për mbarëvajtjen e plotë të zgjedhjeve të vitit 2021 në dy projekte prioritare të KQZ, përkatësisht:

“Projektin e Identifikimit Elektronik te Zgjedhësve” dhe “Projektin pilot te Votimit dhe Numërimit Elektronik”.

Akti Normativ, nuk e ka lënë pas dore as Arsimin, ku Qeveria po alokon fondin shtesë prej 100 milionë lekë, ne programin e kërkimit shkencor për Ministrinë e Arsimit, Rinisë dhe Sporteve.

Më tej, ministrja shpjegon se ky vit ka pasur edhe numrin më të madh të Akteve Normative, përkatësisht katër të tillë dhe e gjitha kjo si pasojë e dy tronditjeve të mëdha që vendi ynë përjetoi në ekonomi, si pandemia dhe tërmeti.

Një aspekt shumë i rëndësishëm i këtyre ndryshimeve ka qenë edhe një tjetër projekt i madh i qeverisë, sipas ministres Denaj, si Rindërtimi, për të cilën ministrja thotë se për tre vite duke filluar nga 2020 janë parashikuar në total 65 mld lekë.

“Ky fond që sot nuk ezaurohet kalon edhe për vitet në vijim, duke synuar që në tre vitet 2020-2022 mbështetja buxhetore me 65 miliardë lekë të akorduara për fondet e rindërtimit të jetë një realitet, por dhe procedurat që janë duke u ndjekur në vijim të mundësojnë këtë sa më shpejt.”

Qeveria shqiptare është e fokusuar që në vitin 2023 të rikthejë bilancin pozitiv në Buxhet u shpreh ministrja në mbyllje të fjalës.

Geri Kolgega / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.