Ministrja e Financave në Doganën e Durrësit, Vukaj: Ndjekje penale për ata që favorizojnë sponsorizuesit e fushatës
Administrata doganore duhet të distancohet nga çdo veprim i paligjshëm që cënon standardet zgjedhore. Është kjo deklarata e Ministres së Financave Helga Vukaj drejtuar këtij institucioni, e bërë gjatë një inspektimi në Degën Doganore Durrës.
Sipas Vukajt, favorizimi i operatorëve të biznesit, të cilët synojnë të kontribuojnë me financime në fushatën elektorale, do të ndiqet nga masa administrative dhe ndjekje penale të punonjësve që shkelin ligjin.
Përmbushja e objektivave fiskalë dhe ndjekja strikte e procedurave doganore duhet të vijojë të mbetet një prioritet i doganës.
Gjatë takimit me Shërbimin Doganor dhe Policinë Kufitare të Durrësit, ministrja e Financave u shoqërua edhe nga ministri i Brendshëm, Dritan Demiraj.
Vukaj kërkoi rritjen e eficencës së kontrolleve doganore në luftën ndaj trafikut të drogës, përmes koordinimit të punës dhe planeve të veprimit mes dy strukturave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.