Ministrja e Sipërmarrjes mesazh bizneseve turistike të bllokuara 30 ditë nga Tatimet: Si duhet të veproni
Tatimet kanë njoftuar e publikuar ditët e fundit emrat e një numri të madh biznesesh turistike që janë penalizuar pasi janë konstatuar problematika me moslëshimin e kuponit tatimor, mosdeklarimin e punonjësve e për probleme të tjera që lidhen me informalitetin.
Krahas gjobës, bizneset janë penalizuar edhe me bllokimin 30 ditor të aktivitetit. Në këto kushte, ministrja e Sipërmarrjes Sonila Qato u ka bërë ftesë bizneseve që pretendojnë se janë penalizuar pa të drejtë, që të shfrytëzojnë mundësinë që ofron ligji për ankimimin e vendimit për bllokim në Gjykatën Administrative.
“Lufta ndaj informalitetit ka qenë dhe do të jetë kryefjala e këtij mandati, ndaj kontrollet e verifikimit për subjektet që ushtrojnë veprimtarinë e tyre ekonomike në zonat turistike do të vijojnë të kryhen me qëllim reduktimin e ekonomisë informale dhe marrjes së shërbimit më të mirë nga ana e qytetarëve.
Për të gjithë bizneset e pezulluar të cilët pretendojnë se janë sanksionuar pa të drejtë ka një hapësirë ku mund të ankimojnë bllokimin 30 ditor nëpërmjet Gjykatës Administrative derisa çështja të mund të shqyrtohet në themel. Ne padyshim jemi dhe do të mbetemi gjatë gjithë sezonit krah çdo sipërmarrësi i cili kërkon ndihmë apo mbështetje, ama sigurisht sipërmarrja duhet të respektojë detyrimet ligjore në mënyre korrekte me qëllim garantimin e një konkurrence të ndershme dhe tregu të drejtë për të gjithë” shkruan Qato në një postim në rrjetet sociale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.