Ministrja Xhaçka në Kabul – “Rrisim me 60% praninë tonë në Afganistan”
Shqipëria do të rrisë me 60% të trupave, prezencën e saj në Afganistan duke filluar që vitin e ardhshëm . Rritja e numrit të efektivëve, mes të cilëve edhe një kontingjent i Forcave Speciale, u konfirmua gjatë vizitës 24 orëshe të Ministres së Mbrojtjes, Olta Xhaçka në Kabul, Afganistan.
Xhaçka teksa ka shprehur mirënjohjen efektivëve shqiptarë u shpreh se vendimi për zgjerimin është përgjigjja në emër të partneritetit strategjik me SHBA.
Ministrja është pritur në një takim të veçantë nga Komandanti i Misionit të NATO-s Resolute Support, gjenerali John Nicholson. Ky i fundit ka vlerësuar kontributin e trupave shqiptare që prej vitit 2002 në Afganistan.
Në një komunikim të drejtpërdrejtë nga Tirana, Kryeministri Rama deklaroi se ndonëse nuk është bërë gjithçka që efektivët shqiptarë në misionet jashtë vendit meritojnë, vëmendja e Qeverisë për ta është maksimale.
Aktualisht, FARSH janë angazhuar me një personel prej 83 trupash në Afganistan, e konkretisht në Kabul, Herat apo Mazar e-Sharif.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.