Miratohet ‘Buxheti Faktik i 2019’/Ministria Financave: Borxhi publik në masën 65.9%, prej katër vitesh shënon ulje të nivelit
Ditën e sotme u prezantua projektligji “Për miratimin e Buxhetit Faktik 2019”, në Komisionin e Ekonomisë dhe Financave, ku një pjesë të rëndësishme zuri ecuria e borxhit publik.
Sipas Mimoza Dhëmbit Drejtoreshë e Përgjithshme e Buxhetit në Ministrinë e Financave dhe Ekonomisë niveli i borxhit është në masën 65.9% të PBB-së dhe prej katër vitesh tashmë ky nivel ka pësuar ulje, gjë që konfirmon edhe njëherë ecurinë pozitive të tij.
Ndërkohë që krahasuar me vitin e fundit 2018, niveli i borxhit ka rënë me 2%
Për të reduktuar dobësitë e lidhura me borxhin publik, Ministria e Financave dhe Ekonomisë ka ndërmarrë disa masa për rregullime fiskale gjatë viteve të fundit. Gjithashtu, reforma kundër informalitetit ka ndihmuar në rritjen e mbledhjes së të ardhurave, duke mbetur një prioritet i vazhdueshёm.
“Sa i përket menaxhimit të borxhit gjatë këtyre viteve, kemi zvogëluar risqet e ndryshimit të termave duke diversifikuar dhe zgjatur ndjeshëm maturitetin e borxhit tonë”, shtoi përfaqësuesja e ministrisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.