Miratohet kandidatura e Luela Hajdaragës, Bushati: Ambasada në Greqi post kyç, nuk plotëson kushtet e karrierës e formimit
Komisioni Parlamentar i Punëve të Jashtme ka miratuar kandidaturën e Luela hajdaragës, vajza e ish-Ministrit të Brendshëm, Luan Hajdaraga, si ambasadore në Greqi. Kandidatura u votua nga të gjithë deputetët e pranishëm, me përjashtim të ish Ministrit të Jashtëm Ditmir Bushati, I cili shprehu rezerva të forta për formimin professional të Hajdaragës, e cila nuk plotëson kushtet e formimit professional dhe të karrierës për të mbuluar këtë post.
“Dua të ndaj disa shqetësime. Kushtetuta imponon që të kemi një vakancë që të vazhdojë procedura e zëvendësimit. Kryeministri ka propozuar zëvendësimin, por Presidenti i Republikës nuk është shprehur për të krijuar vakancën. Pa u shprehur presidenti me dekret, komisioni nuk ndërmerr asnjë veprim. Pa dekret nuk bëhesh dot ambasador. Këtë praktikë e kemi ruajtur që nga 2015-a. Ambasador bëhesh ose me histori karriere, do një gradë të caktuar, nuk bëhesh me bashkëngjitje. Gjetëm në 2013 me njerëz më shumë jashtë sistemit diplomatik, se sa brenda. Ne vendosëm një rregull. Duhen 12 vjet eksperiencë në sistemin diplomatik të bëhesh ambasador.
Nëse vjen nga jashtë sistemit të karrierës, ligji jonë na detyron se duhet të ketë 10 vjet përvojë pune në cështje të jashtme, dhe 3 vjet në pozicione drejtuese. Sekretari i Përgjithshëm i MEPJ duhet të na japë një arsyetim për këtë cështje. Duhet të zbatojmë ligjin që e kemi miratuar po ne si mazhorancë“.
Bushati solli në vëmendje historikun e ambasadorëve shqiptarë në Greqi, ku përfshihen persona të spikatur.
Ne kemi pasur ambasador të parë Mit’hat Frashërin në Greqi. Në gjithë historinë tonë, të gjithë ata që kanë shërbyer në Greqi, ose kanë qenë njerëz me karrierë të spikatur diplomatike, apo njerëz me profil shumë të lartë publik. Edhe në komunizëm. Sekretari i Përgjithshëm të na tregojë pse po e ndryshojmë këtë traditë 100 vjecare. Nuk jemi as në kushtet e ligjshmërisë. Le t’u themi lamtumirë ligjeve që kemi bërë vetë. Nëse jemi bëri pishman, ne t’ua themi njerëzve“.
Bushati shfaqi rezerva edhe lidhur me shkarkimet në Ambasadën Shqiptare në Greqi, mes të cilëve edhe e ambasadores Ardiana Hobdari.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.