Miratohet ligji për kontratën e HEC Skavica – Balluku: Rrit kapacitetet edhe për HEC-et e tjerë të Kaskadës, redukton përmbytjet

Parlamenti ka miratuar ligjin që i hap rrugë miratimit të procedurës së veçantë për negociimin dhe ekzekutimin e kontratës me kompaninë “Bechtel International”, për projektimin dhe ndërtimin e hidrocentralit të Skavicës. Gjatë fajlës së saj në Kuvend, ministrja e Infrastrukturës dhe Energjisë Belninda Balluku tha se ndërtimi i këtij hidrocentrali Do të sjellë rritje të kapaciteteve edhe për 3 HEC-et e tjerë të kaskadës së Drinit, si dhe do të reduktojë përmbytjet në zonën e nën Shkodrës.

Teksa iu referua studimeve të kryera deri më tani nga Korporta Elektro Energjetike Shqiptare, Balluku tha se vlera e investimit parashikohet të arrijë në 550 mln USD, ndërkohë që sa i takon fuqisë së intaliar, ajo do të përcaktohet pas stuydimeve që do të kryhen pas nënshkrimit të kontratës së parë me kompaninë Bechtel International.

Sipas ligjit kontrata do të ndahet në dy faza. Kontrata e fazës së parë, do të përfshijë aktivitetet paraprake të punës që do t’i mundësojnë Bechtel të paraqesë një propozim tek Autoriteti Kontraktues për projektimin dhe ndërtimin e këtij hidrocentrali, si dhe të ndihmojë ministrinë dhe qeverinë shqiptare në sigurimin e mbështetjes financiare për projektin. Ndërkohë që, kontrata e fazës së dytë që konsiston në projektimin dhe ndërtimin e hidrorocentralit të Skavicës.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.