Miratohet projektligji për Vetting-un e Policisë së Shtetit – Hodaj: Ministria e Brendshme nuk do të jetë pjesë e procesit të vlerësimit

Këshilli i Ministrave ka miratuar sot projektligjin për “Për vlerësimin kalimtar dhe periodik të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat”. Ky projektligj përcakton të gjitha parimet, kriteret, procedurat e vlerësimit, standardet, organizimin, funksionimi e organeve të vlerësimit të këtyre institucioneve.

Zëvendësministri i Brendshëm Julian Hodaj tha në një deklaratë për shtyp se kjo nismë ka për qëllim krijimin dhe konsolidimin e institucioneve të forta dhe të besueshme. Hodaj shtoi më tej se prioritet kryesore mbetet promovimi i atyre që janë të ndershëm dhe të përkushtuar.

“Vlerësimi kalimtar i punonjësve të Policisë së Shtetit, Gardës së Republikës dhe SHÇBA-së, nuk është thjesht largimi i disa individëve nga këto struktura. Padyshim pastrimi i radhëve është i rëndësishëm në kushtet brenda tyre ka elementë të prekur nga krimi, korrupsioni apo të paaftë. Gjithsesi, aspekti më i rëndësishëm i kësaj nisme është një tjetër: është promovimi i atyre që janë të ndershëm, të aftë dhe të përkushtuar, është çlirimi i energjive pozitive, sot disi të fjetura, tek pjesa e shëndoshë e këtyre institucioneve.”

Hodaj më tej në fjalën e tij tha se është përzgjedhur një model i përzier, ku sipas tij gradat e larta vlerësohen nga komisione të pavarura me punonjës të rekrutuar nga jashtë. Ndërsa sa i takon niveleve të tjera, sipas tij ato integrohen me punonjës të cilët e kanë kaluar vlerësimin me sukses.

Sipas tij drafti u hartuan me bashkëpunimin e misioneve që asistojnë Policinë e Shtetit, PAMECA dhe ICITAP dhe projektligji ka kaluar përmes një procesi gjithëpërfshirës konsultimi me vetë punonjësit.

Ministria e Brendshme nuk do të përfshihet në këtë proces i cili përfshin vlerësimin e rreth 13 mijë punonjësve, ndërkohë partnerët ndërkombëtarë do të kenë rol monitorues dhe këshillues.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.