Miratohet shtyrja e Brexit – May duhet të ofrojë një zgjidhje deri javën e ardhshme
Parlamenti britanik miratoi këtë javë ligjin që detyron Kryeministren Theresa May që të kërkojë vonesën e Brexit, për të parandaluar daljen e ç’rregullt pa marrëveshje më 12 Prill. Ligji kaloi në të gjitha fazat në parlament në më pak se 6 orë dhe u miratua me një votim përfundimtar me 313 pro dhe 312 kundër. Tashmë duhet të kalojë në dhomën e Lordëve. Kryeministrja tha më herët gjatë javës se do të kërkojë një tjetër zgjatje të shkurtër të Brexit përtej datës 12 Prill, në mënyrë që të gjejë kohë që të bashkëpunojë me liderin e opozitës Jeremy Corbyn, për të kaluar paketën e saj që u refuzua 3 herë në parlament.
Çdo vonesë shtesë për Brexit do të kërkojë miratim unanim nga liderët e Bashkimit Europian. Për të shmangur daljen pa marrëveshje më 12 Prill, Theresa May duhet t’i prezantojë liderëve europianë gjatë samitit të javës së ardhshme një strategji të pranueshme, që do të fitojë edhe parlamentin britanik. Corbyn tha se kryeministrja nuk ka bërë punë mjaftueshëm për të zgjidhur çështjen.
“Qeveria duhet të kuptojë se parlamenti nuk mbështet marrëveshjen e saj. Ajo duhet të gjejë diçka më të pranueshme për parlamentin, diçka që përputhet me këndvështrimin e laburistëve, pavarësisht se është vonë. Rreziku i daljes automatikisht pa marrëveshje është i lartë.”
Theresa May tha se nëse nuk bie dakord me Corbyn, atëherë do të duhet të gjejë disa alternativa mbi marrëdhënien e ardhshme me BE, që do të votohen në seri në parlament.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.