Miratohet vendimi për ndërtimin e Aeroportit të Kukësit – Balluku: 12 mijë të punësuar në fazën finale të projektit

Qeveria ka miratuar ditën e sotme vendimin për ndërtimin e aeroportit të ri ndërkombëtar të Kukësi. Lajmin për miratimin e kontratës koncesionare 35-vjeçare e ka bërë të ditur ministrja e Infrastrukturës dhe Energjisë, Belinda Balluku në një dalje për mediat.

Sipas Ballukut, fillimisht ky projekt do të punësojë rreth 220 persona, ndërsa nga përllogaritjet numri i tyre pritet të arrijë në 12 mijë persona në fazën finale të tij.

“Kontrata sot u miratua me vendimin e Këshillit të Ministrave. Hyrja e saj në fuqi i hap rrugë ndërtimit të Aeroporti të Kukësit. Kohëzgjatja e kontratës së koncesionit është 35 vite, kohëzgjatja e zbatimit të punimeve dhe afati i vënies në operim është 24 muaj, vlera e rehabilitimit të aeroportit të Kukësit është rreth 8 milionë. Nga zhvillimi i projektit ndërtues dhe më vonë në atë të zhvillimit të aktiviteteve në Aeroportin Ndërkombëtar të Kukësit, do të punësohen fillimit 220 persona. Ndërkohë, që nga përllogaritjet dhe kryqëzimi i të dhënave të projekteve të ngjashme mbështetur dhe në destinacionet e ndërtimeve që do të kryhen, numri i punonjësve që do të punësohen pritet të shkojë rreth 12 mijë persona në fazën finale të realizimit të këtij projekti.”

Ndërkohë, sa i takon fluksit të lëvizjes, ministrja e MIE tha se nga përllogaritjet paraprake pritet që shifra të arrijë në 300 mijë pasagjerë në vit, ndërsa do të rritet ndjeshëm në vitet pasuese.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.