“Miratoni bilanc vjetor për vetëprodhuesit e energjisë!” – Kërkesat ndaj MIE, Papaj: Me rëndësi edhe për bizneset që do dalin në treg të lirë energjie
Kompanitë që operojnë në tregun e energjisë fotovoltaike i kërkojnë Ministrisë së Infrastrukturës dhe Energjisë impelmentimin e menjëhershëm të bilancit vjetor të energjisë elektrike të prodhuar nga dielli për qëllime autokonsumatore. Inxhinieri Bruno Papaj, i cili është përfaqësues i një prej kompanive që operojnë në këtë sektor, thotë për TV SCAN se bilanci mujor që kryhet aktualisht kufizon shfrytëzimin e këtyre impainteve nga bizneset.
Kompanitë kërkojnë gjithashtu edhe rritjen e fuqisë së instaluar fotovoltaike nga 500 kW në 1000 kW për vetëprodhuesit, si dhe krijimin e një platforme online për aplikim për lidhjen me rrjetin e vetëprodhuesve të energjisë. Papaj thotë se këto kërkesa nisen nga situata e pandemisë, kriza energjetike, por edhe nga vetë parashikimet ligjore në fuqi, ndërkohë që ndërmarrja e tyre do të vijë një një kohë kur prej janarit pritet që bizneset e lidhur në tensionin 20 KV do të dalin në treg të lirë energjie.
Kërkesat e kompanive i janë drejtuar Ministrisë së Infrastrukturës dhe Energjisë, Operatorit të Shpërndarjes së Energjisë Elektrike dhe Entit Rregullator të Energjisë edhe përmes një shkrese zyrtare, që mban datën 1 nëntor, por deri më tani nuk ka patur asnjë reagim në lidhje me këtë çështje. Ndërkohë që, në shkresë është theksuar se, rëndësia e implementimit të propozimeve është kritike në kushtet e emergjencës, me ndikim jo vetëm në investimet e klientëve , por me impakt edhe më të madh për çdo konsumator fundor në Shqipëri, çmimi i produktit ose shërbimit të të cilit lidhet drejtpërdejt me mënyrën sesi prodhuesit shqiptarë vendosin të prodhojnë ose jo energjinë që ata konsumojnë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.