Mirëmbajtja e rrugëve – ARRSH tender 98 mln lekë për Tunelin e Kërrabës
Autoriteti Rrugor Shqiptar ka hapur procedurat e tenderimit për menaxhimin dhe mirëmbajtjen e pajisjeve të operimit të Tunelit të Kërrabës me një fond limit prej 98 milionë lekësh.
Përmes kësaj synohet menaxhimi dhe mirëfunksionimi i tunelit, ambienteve përreth tij, mirëmbajtja e pajisjeve gjatë një periudhe 12 mujore nga kontraktori i cili do të lidhë kontratë.
Aktualisht ka përfunduar Loti 1 i Tunelit të Kërrabës nga rrethrrotullimi i TEG-ut në rrethrrotullimin e Ibës, Loti 3 – Dalja e Tunelit të Kërrabës – Elbasan. Aktualisht, në drejtimin Tiranë – Elbasan funksionon me të dy korsitë, ndërsa në drejtimin Elbasan – Tiranë vetëm me një korsi.
Operatorët do të kenë mundësi të dorëzojnë ofertat e tyre deri në datën 23 mars 2018. Kohëzgjatja e kontratës është parashikuar të jetë 12 muaj që nga nënshkrimi i saj.
Mirëmbajtja rrugëve është prezantuar edhe si një nga objektivat parësorë të qeverisë shqiptare, e cila muajin e kaluar krijoi edhe Flotën e Solidaritetit.
Ndërkohë, ministri i Infrastrukturës dhe Energjisë, Damian Gjiknuri, është shprehur më herët se procesi i mirëmbajtjes së rrugëve do të vazhdojë sipas modelit të Bankës Botërore.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.