“Mjegulla”, bllokohen 22 dëngje me rroba në Kapshticë! Dega doganore: Mbështesim përpjekjet kundra kontrabandës
Policia e Korçës ka njoftuar finalizimin e operacionit policor “Mjegulla” duke vënë në pranga 7 persona me akuzën e kontrabandës. Pjesë e të arrestuarve janë edhe disa punonjës të doganës së Kapshticës. Referuar policisë, janë sekuestruar 22 dëngje me rroba të përdorura duke i futur kontrabandë nëpërmjet degës doganore të Kapshticës. Për këtë ngjarje ka reaguar edhe dega doganore e Kapshticës e cila konfirmon se janë marrë të gjitha masat që puna të vijojë normalisht.
Korçë, Goditet një tentativë për kontrabandë me mallra.Mbrëmjen e djeshme Sektori i Hetimit Kundër Narkotikëve e Trafiqeve, Sektori për Hetimin kundër Krimeve Ekonomike e Financiare në Drejtorinë Vendore të Policisë në bashkëpunim me Sektorin e Shërbimit për Çështjet e Brendshme dhe Ankesat (SHÇBA) në Korçë, pas një pune të mirëfilltë policore goditën një tentativë për kontrabandë me mallra. Policia dhe SHÇBA arrestuan në flagrancë 7 persona, nga të cilët 3 doganierë, 1 punonjës policie, 3 shtetas, si dhe 2 të tjerë u shpallën në kërkim. Veprimet u finalizuan me sukses përgjatë operacionit të koduar “Mjegulla”. Të arrestuar janë:- F. G., 45 vjeç, banues në Tiranë, me detyrë përgjegjës turni në doganën Kapshticë;- F. B., 56 vjeç, me detyrë doganier në Pikën e Kalimit Kufitar Kapshticë;- G. K, 33 vjeç, banues në fshatin Baban, Devoll me detyrë doganier- S. D., 53 vjeç, banues në Zëmblak, Maliq, me detyrë punonjës policie, kontrollor në Kapshticë; – K. K., 42 vjeç, banues në Bulgarec, Korçë;- Xh. S., 34 vjeç, banues në Vloçisht, Maliq;- G. Sh, 34 vjeç, banues në Dvoran, Korçë;Ndërsa shtetasit G.A., 32 vjeç dhe S.Sh., 53 vjeç, u shpallën në kërkim. Në hyrje të qytetit të Bilishtit, shtetasit e lartpërmendur janë kapur në flagrancë duke transportuar në bashkëpunim 22 ngarkesa me veshje të ndryshme të dyshuara kontrabandë, të cilat u sekuestruan në cilësinë e provës materiale, me mjetet tip ‘Mitsubishi’ ; ‘Volkswagen’ dhe një mjet kamion. Ngarkesa me veshje u transportua nga Greqia në drejtim të Shqipërisë, përmes Pikës së Kalimit Kufitar të Kapshticës. 5 shtetasit e sillnin sasinë e veshjeve deri në Pikën e Kalimit Kufitar të Kapshticës me një kamion, të cilin e parkonin në doganën greke dhe më pas brenda ditës kalonin 3-4 herë drejt tokës shqiptare mallrat, me mjete të tjera më të vogla transportuese. Mallrat janë futur kontrabandë nëpërmjet Degës Doganore Kapshticë pasi nuk kanë kryer praktikat doganore.Materialet në ngarkim të tyre i kaluan Prokurorisë të Rrethit Gjyqësor Korçë për veprat penale “Shpërdorim detyre, kryer në bashkëpunim” dhe “Kontrabanda me mallra të tjera, kryer në bashkëpunim” dhe po vijnë hetimet për zbulimin e persona të tjerë të implikuar në këtë veprimtari të paligjshme. Policia e Shtetit vijon punën për kontrollin e territorit, parandalimin e ngjarjeve kriminale dhe goditjen e paligjshmërisë, e në këtë kuadër fton qytetarët të telefonojnë falas në numrat 112 dhe 129, kur konstatojnë paligjshmëri, duke i garantuar për reagim të shpejtë dhe të paanshëm.
Posted by Policia e Shtetit on Friday, November 10, 2017
“Duke siguruar se jemi në mbështetje të plotë të të gjitha përpjekjeve të përbashkëta institucionale kundër kontrabandës, Dega Doganore Kapshticë njofton publikun se janë marrë masat që puna në këtë doganë të vijojë normalisht. Të vetëdijshëm për pritshmëritë e opinionit publik, sigurojmë se jemi në krah të çdo përpjekje serioze për zbatimin e rreptë të ligjit dhe hetimin e plotë të të gjithë zyrtarëve dhe punonjësve që dyshohen për shkeljen e tij” thuhet në njoftimin e degës doganore të Kapshticës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.