Mjekët japonezë, kundër lojërave Olimpike / Paralajmërojnë se mbledhja e njerëzve do të krijojë “variantin Olimpik”

Sindikata e mjekëve në Japoni ka paralajmëroi se mbajtja e lojërave Olimpike në Tokio këtë Verë, me dhjetëra mijëra njerëz nga e gjithë bota, mund të sjellë zhvillimin e një varianti të ri “Olimpik” të koronavirusit.  Edhe pse Japonia ka përsëritur vazhdimisht se lojërat Olimpike në Tokio do të jenë të sigurta, pasi u shtynë nga viti i kaluar, vendi ka hasur vështirësi për të përmbajtur një valë të katërt të pandemisë dhe është përgatitur të zgjerojë gjendjen e emergjencës, që mbulon thuajse të gjithë ishullin. “Në mënyrë që të fitohet beteja me koronavirusin, duhet të ndalojë lëvizja dhe prandaj bëjmë thirrje që të anulohen lojërat Olimpike”- tha Naoto Ueyama, kreu i sindikatës së doktorëve në Japoni, pasi mbledhja e njerëzve nga mbi 200 shtete dhe territore do jetë e rrezikshme.  “Nuk mund ta mohojmë mundësinë që një variant i ri të gjenerohet pas lojërave. Nëse kjo ndodh, do të quhet “varianti Olimpik i Tokjos” dhe do fajësohet në 100 vitet e ardhshme si një akt mendjelehtë i njerëzimit”- tha kreu i sindikatës.   Autoritetet japoneze, organizuesit e lojërave Olimpike si dhe Komiteti Ndërkombëtar Olimpik, kanë premtuar se lojërat do vazhdojnë, por me masa strikte të parandalimit të virusit.  Spektatorët e huaj janë ndaluar të hyjnë dhe një vendim mbi spektatorët lokalë pritet më vonë gjatë muajit. Megjithatë, edhe me këto masa, ekzistojnë shqetësime mbi fluksin e atletëve dhe zyrtarëve drejt Japonisë, ku procesi i vaksinimit është shumë i ngadaltë.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.