Modeli turk i amnistisë – Taksë 1% për këdo që regjistron pasurinë, sy “qorr” për origjinën
Turqia është rasti më i njohur mes organizmave ndërkombëtarë në drejtim të amnistimit të pasurisë dhe aseteve në tërësi, si dhe është rasti më i freskët duke qenë se ligji është ende në fuqi në këtë moment. Turqia ka ofruar shpeshherë amnisti për pasurinë ndër vite, i fundit ndër to, në vitin 2019, ku përshiheshin individët por edhe kompanitë (sidomos për çështje si mospagesave e taksave).
Sipas ligjit të ri, asetet duhet të deklarohen brenda një afati të caktuar dhe individët duhet të paguajnë një taksë prej 1%. Sipas këtij ligji, asetet jashtë vendit duhen rikthyer në vend dhe deklaruar në bankë, ndërsa astetet brenda vendit duhen deklaruar te autoritetet tatimore. Personat, por edhe kompanitë që paguajnë taksën prej 1% përjashtohen nga çdo lloj hetimi dhe ekzaminimi i pasurisë së tyre. Ky ligj është zgjatur me vendim të presidentit Erdogan deri në fund të qershorit 2020. Amnistia vlen per të gjitha asetet, si depozita bankare, aksione, flori apo monedhë të huaj.
Bankat turke janë të detyruara vetëm të aplikojnë një taksë prej 1% mbi këto fonde. Në këmbim, qeveria lejon kapitalin lirisht në vend, duke bërë shumë pak, ose aspak, pyetje për origjinën e këtyre parave. Ligji ka për qëllim që të sjellë kapitalin në ekonomi, sidomos pas krizës së monedhës në vitin 2018. Të njëjtën gjë ka bërë edhe në vitin 2008 qeveria turke, dhe asokohe arriti të sjellë brenda ekonomisë turke rreth 7 miliardë euro para të regjistruara, shtesë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.