Mogherini në Kosovë: Lufta kundër korrupsionit dhe demarkacioni, kusht për liberalizimin e vizave
Përfaqësuesja e Lartë e Bashkimit Evropian për Politikë të Jashtme dhe Siguri ndodhet në një vizitë zyrtare në Prishtinë, ku është takuar me krerët e politikës së Kosovës.
Gjatë takimit me Kryeministrin e Kosovës Isa Mustafa, Mogherini theksoi se kusht për liberalizimin e vizave është ratifikimi i marrëveshjes për demarkacionin me Malin e ZI dh lufta kundër korrupsionit.
“Janë dy kushte që duhet të plotësohen para liberalizimit të vizave. Kosova të përmirësojë luftimin e krimit të organizuar dhe korrupsionit. Ratifikimi i marrëveshjes për demarkacionin e kufirit me Malin e Zi. Nga vizita ime e kaluar nuk është bërë progres. Është koha të votoni ratifikimin e marrëveshjes për demarkacionin me Malin e Zi. Kjo do zhbllokojë liberalizimin e vizave”.
Nga ana tjetër Kryeministri Isa Mustafa, deklaroi se “ne po punojmë që Kosova të jete faktor i rëndësishmi i partneritetit dhe paqes në rajon”.
“Ne e shohim dialogun me vendet fqinje si alternative për normalizimin marrëdhënieve jemi të përkushtuar që të vazhdojmë dialogun me Serbin për normalizimin e marrëdhënieve edhe në Ballkan edhe Evropë, përkundër kundërshtimeve që kemi nga opozita. Ne po punojmë që Kosova të jete faktor i rëndësishmi i partneritetit dhe paqes në rajon”.
Më herët Mogherini është takuar edhe me presidentit e Kosovës Hashim Thaçi. Sipas Thaçit përfaqësuesja e Lartë e Bashkimit Evropian i ka dhënë përkrahje procesit të integrimit evropian dhe hapave konkretë e të menjëhershëm për liberalizimin e vizave.
“Kosova dhe rajoni kemi sfida të ndryshme, por kemi aspiratë dhe prioritete të njëjta – zhvillimin dhe anëtarësimin në Bashkimin Evropian. Vizita e Përfaqësueses së Lartë, Mogherini, është konfirmim se Bashkimi Evropian është i përkushtuar që edhe Ballkani Perëndimor të bëhet pjesë e unionit”, ka shkruar Thaçi në Facebook pas takimit me Mogherinin.
Vizita e Mogherinit në Kosovë, realizohet në kudër të turneut të saj në Ballkan, e cila më parë ka Vizituar Shkupin, Beogradin dhe Tiranën.
Eralda Zito/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.