Mogherini pret delegacionin nga Kosova – “Prania juaj në Bruksel, shenjë e vullnetit për normalizim”
Përfaqësuesja e lartë e Bashkimit Europian për politikën e jashtme është takuar me një delegacion nga Kosova, të caktuar për të dialoguar me Brukselin në lidhje me çështjen e tarifës 100% ndaj importeve serbe në vend. Përfaqësuesja e lartë, në një njoftim për shtyp fill pas takimit, sqaron faktin se, prania e delegacionit nga Kosova në Bruksel, është shenjë e qartë e vullnetit politik të Kosovës për të normalizuar marrëdhëniet me Beogradin, por edhe me Europën, në këto kohë përplasjesh të mëdha.
Sipas Mogherinit, normalizimi i marrëdhënieve është një kriter kyç për rrugëtimin europian të Kosovës. Mogherini sqaron gjithashtu se, takimi shërbeu për të njohur edhe pretendimet e Prishtinës zyrtare në lidhje me çështjen e tarifës 100%. Pavarësisht dialogut në Bruksel ditën e Martë, ajo i bën apel autoriteteve dhe qeverisë së Kosovës që të tërheqin tarifën 100%.
Kjo, sipas përfaqësueses së lartë, do të jetë e domosdoshme në mënyrë që në të ardhmen të arrihet një marrëveshje mes Prishtinës dhe Beogradit për normalizimin e plotë të marrëdhënieve mes dy vendeve. Bashkimi Europian është angazhuar maksimalisht në këtë proces duke investuar kohë dhe burime njerëzore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.