Mogherini, turi në Ballkan nis me një vizitë dy-ditore në Tiranë – Pritet rekomandimi për çeljen e negociatave

Përfaqësuesja e Lartë e Bashkimit Europian për Çështjet e Huaja dhe Politikat e Sigurisë, Federica Mogherini, do të zhvillojë gjatë javës së ardhshme një tur vizitash zyrtare në vendet kandidate të Ballkanit Perëndimor.

Turi do të nisë nga Tirana më datë 17 Prill, ku Mogherini pritet të ndalet për dy ditë për t’u takuar me krerët e shtetit dhe përfaqësuesit e politikës në Shqipëri. Kjo datë përkon me publikimin e raportit të zgjerimit të Komisionit Europian, ku pritet që KE të rekomandojë pa kushte çeljen e negociatave për anëtarësimin e Shqipërisë në BE.

Më pas Mogherini do të udhëtojë më 18 Prill drejt Shkupit, ku do t’i bashkohet edhe Komisioneri i Politikave të Fqinjësisë dhe Negociatave për Zgjerimin, Johannes Hahn. Edhe në Maqedoni, përfaqësuesja e lartë e BE do të zhvillojë një vizitë dy ditore. Ashtu si Shqipëria, zyrtarët në Shkup presin marrjen e një rekomandimi të pakushtëzuar drejt Këshillit të Europës për të nisur bisedimet.

Ndërkohë, më e shkurtër do të jetë vizita në Malin e Zi dhe Serbi. Mogherini do të vizitojë si Tivarin dhe Beogradin brenda datës 19 Prill. Bie në sy ndërkohë mospërfshirja në këtë tur e vizitave në shtetet kandidatura potenciale për në BE, Bosnje Hercegovinë dhe Kosovë.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.