Monitorimi i kontratave koncesionare, Denaj: Ministria e Financave s’merr asnjë raport mbi performancën e tyre
Aktualisht Ministria e Ekonomisë dhe Financave nuk merr asnjë raport mbi ecurinë e kontratave koncesionare apo të partneritetit publik privat, duke mos patur informacion mbi risqet fiskale dhe buxhetore që ato mund të paraqesin gjatë zbatimit të tyre.
Gjithçka është pohuar nga ministrja e Ekonomisë dhe Financave, Anila Denaj, gjatë diskutimeve në Komisionin parlamentar të Ekonomisë, të ndryshimeve në ligjin “Për koncesionet dhe partneritetin publik privat”, ku ndër të tjera parashikohet një rritje e kompetencave të këtij dikasteri, në këtë drejtim.
Ndërkaq, projektligji parashikon heqjen e ofertës së pakërkuar në sektorin e infrastrukturës rrugore, por diskutimet u fokusuan te hyrja në fuqi e tij. Sipas Denajt, vendosja e datës 1 korrik ka patur si qëllim lënien e kohës së nevojshme për nxjerrjen e akteve nënligjore.
Më herët deputetët e opozitës kanë akuzuar qeverinë se deri në 1 korrik do të vijojë të vjedhë përmes nënshkrimit të këtyre kontratave, sikurse është aksi Orikum-Dukat.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.