Monitorimi i lojërave të fatit – Qeveria miraton koncesionin 30-vjeçar
Në mbledhjen e qeverisë, Këshilli i Ministrave ka vendosur të miratojë kontratën për ndërtimin dhe mirëmbajtjen e sistemit qendror të monitorimit “online” për industrinë e lojërave të fatit. Kontrata e miratuar është lidhur mes Ministrisë së Financave dhe bashkimit të shoqërive “Admiral Sportwetten”, “Atsi” dhe “MC Networking”.
Pak kohë më parë, Ministria e Financave shpalli firmën fituese, të monitorimit të lojërave të fatit. Bashkimi i përkohshëm i këtyre kompanive ka marrë 904 pikë në renditjen e tenderit, duke lënë pas konsorciumin që përfaqësohej nga “Qualysoft”. Ky konsorcium do të monitorojë për 30 vite aktivitetin e basteve dhe kazinove.
Një tjetër vendim i miratuar nga qeveria ishte edhe metodologjia për përcaktimin e çmimit të blerjes së energjisë elektrike, të prodhuar nga burimet e vogla të rinovueshme si dielli dhe era.
Enti Rregullator i Energjisë do të miratojë çmimin e blerjes së energjisë elektrike, në përputhje me çmimin e mesatarizuar për vitin 2017, sipas parashikimeve të kësaj metodologjie.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.