“Moody`s” nuk ndryshon mendim – Të njëjtin vlerësim si më parë për Shqipërinë
Agjencia e vlerësimit të kreditit, Moody`s, ka përfunduar rishikimin e profilit të kreditit të Shqipërisë, duke ruajtur të njëjtin qëndrim si më parë sa i përket vlerësimit ekonomik të vendit.
Njoftimi i agjencisë së vlerësimit konfirmon pikëpamjet e shpalosura nga vetë ajo në raportin e mëparshëm, atë të 13 Shkurtit, të publikuar ekskluzivisht dhe nga Scan. Nota e borxhit sovran mbetet në B1 me perspektivë të qëndrueshme.
Të gjitha shtyllat e profilit të riskut të Shqipërisë mbeten të njëjta me atë të publikimit të 13 Shkurtit.
“Profili i kreditit të Shqipërisë, kufizohet nga forca ekonomike e ulët, që reflekton një ekonomi të vogël, me një nivel të ulët diversifikimi krahasuar me të ngjashmit e saj”, thotë Moody`s mes rreshtave të njoftimit.
Edhe forca institucionale e Shqipërisë mbetet si më parë, në të moderuar, si pasojë e hapave që po ndjek qeveria për t`u bërë pjesë e Bashkimit Europian.
Forca fiskale është e dobët, rrjedhojë e borxhit të lartë publik, paçka se në trajektore rënëse.
Edhe detyrimet e prapambetura në sektorin energjetik, si dhe skemat e partneritetit publik privat janë vendimtare në vlerësimin e dobët të profilit fiskal të vendit nga Moody`s.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.