“Moody’s” për Kinën – Reformat strukturore nuk mjaftojnë për të ndalur rritjen e borxhit
Reformat strukturore në Kinë do të ngadalësojnë rritjen e borxhit, por nuk do të jenë të mjaftueshme për ta ndaluar, për rrjedhojë një zhvlerësim tjetër i borxhit sovran të vendit është i mundur, deklaron Moody’s.
Komentet vijnë dy ditë pasi Moody’s uli vlerësimin e Kinës me një gradë në A1, duke nënvizuar se pret që fuqia financiare e ekonomisë së dytë më të madhe në botë të dobësohet në vitet që vijnë.
Kina e ka kritikuar zhvlerësimin, duke thënë se është bazuar në metodologji të papërshtatshme.
Zyrtarët e Moody’s, janë përgjigjur duke thënë se Agjencia e ka mirëpritur axhendën e reformave të autoriteteve kinezë për të përmbajtur rreziqet nga borxhi i madh.
Megjithatë, sipas Moody’s, reformat mund të ngadalësojnë ritmin e rritjes së borxhit, por nuk do ta ndalojë rritjen.
Agjencia bën të ditur se rimëkëmbja e ekonomisë së dytë më të madhe në botë në vitin e fundit ka ardhur falë politikave stimuluese dhe pret që Pekini të vazhdojë me këtë metodë për të arritur objektivat për rritjen ekonomike.
Moodys deklaron se Kina mund të mos e mbajë vlerësimin A1 nëse borxhi rritet me një normë që tejkalon projeksionet e agjencisë.
Moody’s pret që rritja ekonomike të ngadalësohet në 5% në vitet që vijnë, nga 6.7% që ishte vitin e kaluar.
Stimujt Qeveritar kanë qenë nxitësit kryesorë të rritjes ekonomike në Kinë në vitet e fundit, por kanë sjellë dhe rritjen e borxhit në rreth 300% në raport me Produktin e Brendshëm Bruto.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.