Moody`s skanon Shqipërinë – Projeksionet e dy viteve, rritja në 4%, investimet do të bien

Gjigandi botëror i vlerësimit të kreditit, Moodys` ka mbajtur të pandryshuara projeksionet për rritjen ekonomike të vendit tonë, për këtë vit dhe atë të ardhshëm, në 3.9% dhe 4% respektivisht, duke u rikonfirmuar kështu si institucioni ndërkombëtar më optimist në drejtim të ecurisë së ekonomisë shqiptare përgjatë dy viteve.

Raporti i Moody`s mbi statistikat e ekonomisë shqiptare dhe projeksionet për dy vitet e ardhshme, i siguruar nga “Scan”, tregon kështu se gjatë dy viteve të ardhshme do të ketë edhe një rritje domethënëse të prodhimit të brendshëm bruto për frymë, në 5300 dhe 5600 dollarë respektivisht, nga 4500 që ishte gjatë 2017-ës.

Projeksionet mbi ecurinë e çmimeve ndërkohë janë rishikuar lehtë në rënie, dhe tashmë flasin për një normë inflacioni në 2.8% këtë vit dhe 2.9% vitin e ardhshëm.

Sipas Moody`s, niveli i investimeve në raport me Prodhimin e Brendshëm Bruto do të bjerë ndjeshëm gjatë këtyre dy viteve, dhe në 2019 do të jetë nën 20%.

Edhe investimet e huaja direkte neto projektohet të bien ndjeshëm përgjatë dy viteve të ardhshme, deri në vetëm 7.2% të PBB në 2019.

Ky është efekti i padiskutueshëm i largimit të efektit të “TAP” dhe “Devollit” që janë dy projektet madhore që kanë nxitur investimet, e për rrjedhojë rritjen ekonomike të vendit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.