Moody’s ul perspektivën e Katarit – “Konflikti ka mundësi të zgjasë përtej 2018-ës”
Perspektiva e kreditit të Katarit është ulur në negative nga agjencia e shërbimit të investitorëve “Moody’s”, që paralajmëroi për rreziqe ekonomike dhe financiare nga problemet diplomatike me vendet fqinje.
Agjencia uli perspektivën e vendit nga të qëndrueshme, duke bërë të ditur se nuk ka gjasa të ndodhë një zgjidhje e shpejtë e tensioneve, megjithatë mbajti vlerësimin e kreditit në Aa3.
“Moody’s” deklaroi se aktiviteti ekonomik do të dëmtohet pas shkëputjes së lidhjeve detare dhe tokësore nga Arabia Saudite, Emirated e Bashkuara, Egjipti dhe Bahreini.
“Mundësia e zgjatjes së periudhës së pasigurisë deri në 2018-ën është rritur, gjë që ndikon negativisht bazat e kreditit sovran të Katarit”, deklaron Moody’s.
Kufizimet tregtare të vendosura nga vendet arabe kanë shkaktuar presione në financat dhe aktivet kryesore të Katarit.
Grupi i vendeve, që akuzon Katarin se po financon terrorizmin, ka kërkuar që vendi ti bindet një liste prej 13 kërkesash deri më datën 5 Korrik, për të përfunduar krizën.
Standard & Poor’s uli muajin e kaluar vlerësimin e Katarit me një gradë dhe e vendosi në perspektivë negative.
Një javë më vonë, agjencia tjetër, Fitch, deklaroi se po konsideron një ulje të kreditit. Ministrat e Jashtëm e grupit të udhëhequr nga Arabia Saudite do të takohen ditën e sotme në Kairo për të diskutuar zhvillimet e fundit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.