Mosdekretimi i Lleshit, Rama në Kuvend: Askush s’na ndalon të ushtrojmë mandatin tonë kushtetues

Kuvendi i Shqipërisë në një seancë jashtë radhe votoi dekretimin e Presidentit për shkarkimin e ish ministrit të Brendshëm Fatmir Xhafaj. Kryeministri Edi Rama në fjalën e tij u ndal te mosdekretimi nga Presidenti i Republikës së Shqipërisë të kandidaturës për postin e MB Sandër Lleshi.

“Ne kemi detyrën kushtetuese, pavarësisht nëse kemi apo jo besimin e tjetrit, qofte edhe të Presidentit. Askush tjetër përveç popullit sovran as e ka dhe as e merr dot të drejtën për të na ndaluar të ushtrojmë mandatin tonë kushtetues, kjo vlen edhe për Presidentin.

Nuk figuron gjëkundi kompetenca e refuzimit të ministrave që gëzojnë besimin e kryeministrit.

Edhe pse Kushtetuta nuk i njeh presidentit të Republikës as shprehimisht as me nënkuptim kompetencën për të refuzuar anëtarët e qeverisë, presidenti ka formuluar një letër pa asnjë referencë ligjore”.

Rama: Çfarë më shkruajti Meta në letër

“Lënda: Kthim përgjigje mbi propozimin e emërimit të zotit Sandër Lleshaj si minsitër i Brendshëm. 

Zoti Kryeministër, në përgjigje të shkresës suaj numër 494 datë 27.10.2018. 

Lënda: Propozim për emërim ministri, nëpërmjet të cilës zoti Sandër Lleshaj i propozohet Presidentit të Republikës për tu emëruar ministër i Brendshëm, dëshiroj t’ju bëj me dije se: 

Presidenti i Republikës në cilësinë edhe të kryetarit të Këshillit të Sigurisë Kombëtare, në mbështetje të Kushtetutës, nuk krijoi bindjen e plotë për ti dhënë besimin e tij kandidaturës së zotit Sandër Lleshaj si ministër i Brendshëm. 

Në këto kushte Presidenti i Republikës, nuk mund t’i përgjigjet pozitivisht propozimit tuaj për emërimin e zotit Sandër Lleshaj në detyrën e ministrit të Brendshëm. 

Me respekt Ilir Meta”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.