Mosdorëzimi në kohë i vendimit të ortakut, nga sot aplikohen gjobat – Çfarë penalitetesh parashikon ligji për tatimpaguesit?

Dje ishte afati i fundit kur shoqëritë tregtare dhe personat fizikë, të cilët janë subjekte të tatimit mbi fitimin duhet të dorëzonin në DPT, vendimin e ortakut për miratimin e rezultatit dhe destinimit të fitimit.

Që prej ditës së sotme ka nisur llogaritja në mënyrë automatike e gjobave për tatimpaguesit që nuk e kanë paraqitur këtë vendim. Për mos paraqitjen apo paraqitjen me vonesë të këtij vendimi zbatohet një gjobë prej 10 000 (dhjetë mijë) lekësh, për çdo muaj vonesë.

Por çfarë parashikon ligji për tatimpaguesit?  Konkretisht, ligji nr. 8438, datë 28.12.1998 “Për tatimin mbi të ardhurat”, i ndryshuar, në nenin 33/1, pika 2 të thotë: “Shoqëritë tregtare dhe personat fizikë të cilët janë subjekte të tatimit mbi fitimin, duhet të depozitojnë pranë organeve tatimore, jo më vonë se data 31 korrik e vitit kalendarik, vendimin për miratimin e rezultatit dhe destinimin e fitimit pas tatimit të vitit paraardhës. Për paraqitjen me vonesë të këtij vendimi zbatohet një gjobë prej 10 000 (dhjetë mijë) lekësh për çdo muaj vonesë.”

Drejtoria e Përgjithshme e Tatime ka apeluar gjatë muajit korrik bizneset që të dorëzonin vendimin e ortakut për miratimin e rezultatit dhe destinimin e fitimit, ku sipas tyre në fillim të këtij muaji, një numër i konsiderueshëm tatimpaguesit nuk kishin paraqitur vendimin e kërkuar.

Osman Dedja/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.