Moskovici bën lajmëtarin e BE -Dërgohet në Athinë, kreditorët kërkojnë marrëveshjen
Greqia dhe kreditorët ndërkombëtarë po përshpejtojnë dialogun në mënyrë që të disbursohet sa më shpejt kësti i radhës i huasë, prej 6 miliardë eurosh. I dërguari i Europës në Athinë këtë herë do të jetë vetë Pierre Moscovici, komisioneri për çështjet ekonomike. Ai u takua edhe me ministrin e financave Euclid Tsakalotos, si dhe me kreun e ekzekutivit, Alexis Tsipras.
Monitoruesit europianë kanë kërkuar një marrëveshje përpara 20 shkurtit, kur Eurogrupi mblidhet në Bruksel. “Dëshira për të arritur në një zgjidhej është aty, dhe aty ku ka vullnet ka edhe një zgjidhje”-deklaroi Moskovici pas takimit me kreun e financave greke.
Marrëdhëniet mes Greqisë dhe kreditorëve kanë qënë të ngrira prej thuajse dy muajsh. Vendimi i qeverisë helene për të shpërblyer pensionistët në fundvit bllokoi përfundimisht negociatat. Edhe pozicionimi i Fondit Monetar Ndërkombëtar ka ndërlikuar së tepërmi marrëdhëniet mes Greqisë dhe kreditorëve.
Gjatë javës së kaluar ndërkohë, pas shkrirjes së akujve, palët duket se arritën në një marrëveshje paraprake që do të zhbllokojë edhe këstin e radhës. Gjithsesi, fjala e fundit i takon grupit të ekspertëve, të cilët do të zbarkojnë në Athinë në rast se, Moskovici do të kthehet me lajme të mira në Bruksel.
Gjatë orëve të fundit, ka marrë jehonë lajmi se, kreditorët kanë kërkuar masa shtrënguese shtesë, si shkurtime fiskale të barabarta me 2% të Prodhimit të Brendshëm Bruto. Por, qeveria helene e ka mohuar kategorikisht këtë. Athina zyrtare është shprehur vazhdimisht se nuk do të dakordësohet për asnjë masë shtrënguese shtesë, edhe pse çmimi mund të jetë tepër i lartë.
Roel Korkuti/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.