Mosmarrëveshja mes BE dhe Bernës: fitim afatshkurtër, dhimbje afatgjatë për bursën zvicerane
Mosmarrëveshja tregtare midis Bernës dhe Brukselit ka rritur të ardhurat dhe vëllimet për bursën zvicerane SIX, por mund të dëmtojë investimet në tregjet financiare të Zvicrës, tha të enjten mbrëma Shefi Ekzekutiv i SIX, Jos Dijsselhof. Vëllimi i aksioneve zvicerane është rritur ndjeshëm pas ndalimit të transaksioneve në platformat e Bashkimit Europian që detyruan lojtarët e tregut të hyjnë në tregjet e vendit, duke i dhënë Zvicrës një fitore të shpejtë në linjën e saj të gjatë me Brukselin.
Investitorët në BE dhe Zvicër humbën qasjen e drejtpërdrejtë në shkëmbimet e aksioneve të njëri-tjetrit që nga 1 korriku ndërsa të dy palët u grindën për një traktat partneriteti që ngeci pas vitesh bisedimesh. Para këtij ndalimi, 70% e aksioneve të listuara me vlerë 1.2 trilion dollarë të Zyrihut u tregtuan brenda vendit dhe pjesa tjetër në Bashkimin Europian. Sot, ndodhet pothuajse 100% në Zvicër, bëri me dije Dijsselhof në një intervistë për Reuters. “Në afat të shkurtër, unë jam mjaft i lumtur. Kam pak më shumë vëllim dhe të ardhura. Në planin afatgjatë nuk mendoj se është mirë, “tha ai.
“Unë mendoj se për një klimë të duhur investimesh, që investitorët të kenë ekzekutim më të mirë, duhet të ketë vende të shumta për të ushtruar veprimtarinë e tyre. Nëse kjo nuk realizohet në planin afatgjatë, nuk është mirë për tregun”, u shpreh Dijsselhof. Sipas tij qeveria e BE mendoi ‘ne krijojmë një mjet për të mbajtur peng Zvicrën në mënyrë që të mund ta shtymë atë të ecë përpara në këtë marrëveshje kornizë, por jo nuk funksionoi.
Ka pak shenja që të arrihet një marrëveshje mbi traktatin e ngecur këtë vit me BE-në, e cila në të njëjtën kohë po lufton të krijojë një lidhje të re me Britaninë anëtare që do të largohet.
Më vete, SIX është duke punuar në një platformë të re digjitale të tregtimit, SIX Digital Exchange (SDX), që do të përdor teknologjinë blockchain për të shpejtuar tregtimin. Dijsselhof tha që SIX ishte duke punuar me bankat kryesore globale në aplikacionet më të mira për platformën, me Citibank, JP Morgan Chase dhe Credit Suisse të cilat kanë krijuar ekipe për të ndihmuar në zhvillimin përdorimit të saj. Produkti final i prototipit pritet të përfundojë në fund të vitit ndërsa për tregun do të jetë gati për vitin 2020 sipas parashikimeve të kompanisë.
“Infrastruktura do të jetë më e lirë, nuk do të keni nevojë për kolateral dhe nuk do të ekzistojë rreziku i kredisë. Ka përparësi të mëdha për të lëvizur produktet ekzistuese në të si dhe bankat eventualisht mund të investojnë në platformë, shtoi ai. Rregullatori zviceran po punon ngushtë me SIX për të krijuar një legjislacion sesi të mbikëqyrë platformën e re, tha ai. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.