Mosplotësimi i standardeve të furnizimit me energji – Nga data 15 tetor, konsumatorët do të kenë të drejtë të kërkojnë kompensim

Prej datës 15 tetor Operatori i Sistemit të Shpërndarjes do të jetë subjekt i kërkesës për kompensim nga ana e klientëve fundorë, lidhur me mos përmbushjen e kritereve standarde të cilësisë së shërbimit të shpërndarjes së energjisë elektrike. Vendimi është marrë nga Enti Rregullator i Energjisë, që kishte pezulluar përkohësisht zbatimit e kësaj pike të rregullores, duke “çliruar” OSSH-në, që është një nga kompanitë e krijuara nga ndarja e OSHEE-së nga detyrimi për kompensimin e klientëve në rast se nuk përmbush standardet e përcaktuara të shpërndarjes së energjisë.

Këto standarde u përcaktuan nga ERE në muajin prill të këtij viti, ndonëse rregullorja është miratuar qysh në nëntor të vitit 2017. Referuar kritereve të miratuara tashmë ndërprerja e energjisë elektrike nuk mund të zgjatë më shumë se 2.78 orë pas një defekti në sistemin e shpërndarjes në tensionin e mesëm dhe të ulët, ndërkohë që kjo kohë është më e shkurtër për rrjetin 35, 20, 6-10 dhe 0.4 KV, duke variuar nga 1 deri në 2.74 orë.

Gjithashtu, periudha e njoftimit të ndërprerjeve të planifikuara në sistemin e shpërndarjes duhet të jetë 72 orë, ndërkohë që koha e nevojshme për t’iu përgjigjur ankesave, që kanë lidhje me matjen duhet të jetë 5 ditë pune nga data e paraqitjes së ankesës. Gjithashtu, përcaktohet se koha e nevojshme për të rilidhur energjinë është brenda 48 orësh, nga kryerja e pagesës së detyrimit dhe me kërkesë të klientit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.